آدمیلیکنی پولگه ساتمه‌یلیک

محبوب‌الله توران

 

        بیرینچی آدم، آدم اېکن. باشقه­ آدملر اوندن پیدا بۉلیشه‌­بېریبتی- بیرته، ایکیته، مینگته، بلکه بیر قره‌­سه میلیاردلرچه بۉلییبتی. بیز یشه‌یدیگن اولکه‌­نینگ آدملری هم اۉشه­ آدم اولادلری.

        آدمنامه‌­نینگ باش صفحه‌­لریده، “آدم، دنیاده­‌گی بار مخلوقلرنینگ اېنگ کرامتلیسی و اېنگ معتبری. دنیاده خلیفه‌­لیک مقامیگه اېگه بۉلگن ذات، باشقه موجودلر اوندن ضرر کۉرمه‌­ی، اونینگ تحتِ فرمانیگه‌­دیر، تېنگداشلری بیلن برابرلیکده، سېوگی-قووانچ بیلن، بیر-بیراویگه تینچلیک یره‌­تووچی حالده یشه‌­یدیگن و بیر-بیراوینی اۉلدیرمس-کویدیرمس و قووناق حیات کیچیریب، یخشیلیک بیلن بو دنیادن نـَریگی دنیاگه باره‌یا­تگن بیر موجوددیر”، دېب یازیلگن. خودّی شونده‌­ی گپلرنی سیز هم کۉپگینه کتابلرده اۉقیگن اېکنینگیزگه ایشانچیم کامل.

       بیز راستدن اۉشه آدم اولادلریمیزمی؟!

       مېنیمچه، بیز آدمیلیکنی ایپله‌­یالمه‌­دیک. بیز یشه‌­یدیگن اولکه‌­نینگ آسمانیدن آدمیلیک اۉرنیگه، انتحار، پارتلش، اوق آتیلیش، آدم اۉلدیریش، حرامخورلیک، الداوچیلک، اۉزبیلرمانلیک، جهالت، بونده‌ی دېمه کافر بۉلدینگ دېیش، آدمیلیکنی پولگه ساتیش، من‌ـ‌منلیک، ضعیفـلرگه باسقیم سالیش، غریبلرگه: “موندن ده بدتر بۉل” دېیش و ییقیلگننی ینه‌ـ‌ده تورتیب آلیش کبی قیلمیشلر کۉپراق کۉزگه تشلنه‌دی. بونده‌­ی بیر حالده یشر اېکنمیز و، بو تقدیریمیز اېکنده، دېب اۉزیمیزنی اۉزیمیز کۉندیرماقچی بۉله‌­میز بیران پیلّه. نیمه هم قیلردیک؟! تېنگری یوز اۉگیرمه‌­گن بیزدن. بیز بنده‌­سیمیز کو اخیر، نېگه یوز اۉگیرسین اېندی.

      اېندی بۉلسه هم مَیلی، آدم قدری­گه یېتیب، آدمیلیککه حرمت قیله­‌یلیک. آدملرنی اۉلدیرمه­یلیک و آدمیلیکنی پولگه ساتمه‌­یلیک. باشقه‌­لرنی عاجز کۉریب، بار و یوغینی اۉزیمیزنیکی قیلیب تارتیب آلمه‌­یلیک. باشقه‌­لردن بیزگه اۉخشه‌­گن آدم اولادلری اېکنیدن کۉز یومیب اۉتمه‌­یلیک. آدم یخشی عملـلری بیلن  آدم اېکنینی‌ـ‌ده توشینیب‌آله‌­یلیک. آدم اولادی اېکنمیزمی، آدم بۉله‌­یلیک.

آدم قدریگه یېتگنده‌‌‌ـ‌گینه حیاتیمیز آسمانی مصفـّا بۉلیب، انسانلر ارا مهر-محبت یَیره‌لیب، تورموش تاتلی کېچیشگه قولیراق بۉله‌دی. آدمیلیک حیاتیمیزنینگ اېنگ مهم و اوستون پاغانه‌سی‌دیر؛ بونگه همه نرسه‌دن آلدینراق اینتیلیش ضرور.

قنی اېدی بوندن بویان بۉلسه هم حیاتیمیز آدم اۉلدیریش کبی یامان و توبن بیر عمل تکرارلنمسه اېدی، قنی اېدی حیاتیمیز، سېوگی-محبت بیلن یشش، بیر-بیرنی مهر قوچاغیگه آلیش، باشقه‌لرگه کولگی هدیه اېتیش، دللرده پاک تویغولرنی اویغاتیش، آلغه آدیم تشلش، یامانلیکلردن یوز اۉگیریش، ینگیچه اۉیلش و ینگی یۉللرده یوریش، گوزه‌ل طبیعت‌نینگ باریگه شکر قیلیب اوندن یخشیلب فایده‌لنیش، اېسکیرگن و ناتوغری فکرلردن وازکیچیش، کته‌ـ کیچیکنی بیر-بیریدن اجره‌ته‌آلیش و اولرگه حرمت و شفقت یوللری بیلن باقیش حسلریگه تۉلیب کېتسه اېدی. قنی اېدی عزیز وطنیمیزده‌گی اوروش-جنجاللر یۉق بۉلیب کېتسه اېدی.

نمایش بیشتر

نوشته های مشابه

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *