اۉزبېک تیلیده باله‌لر ادبیاتیگه عاید اوچ کتاب نشر اېتیلدی

یقینده افغانستان نینگ معلومات مرکزی (ACKU) اۉزبېک تیلیده باله‌لر ادبیاتیگه عاید اوچ کتاب نشر اېتدی. “افغانستان تأریخی یېرلری‌ نینگ حکایه‌لری”، “قویاش تیزیمیده اویقو” و “قیشده قیزیل آلمه تېریش” عنوانلی اوشبو کتابلر نینگ تقدیمات مراسمی کابل بیلیم یورتیده جایلشگن افغانستان نینگ معلومات مرکزی بناسیده اۉتکزیلدی.

باله‌لر اوچون تورلی موضوعلرده اوچ تیلیده کتابلر نشر اېتیب کېله‌دیگن افغانستان نینگ معلومات مرکزی قاشیده‌گی “توانا” بۉلیمی مسووللریدن کاظم حمیدی رسا مذکور مراسمده سۉزگه چیقیب، “توانا” نی بوکونگه قدر باله‌لر اوچون 400 عنواندن آشه‌راق کتابلر نشر اېتگنینی بیلدیریب، یقینده اۉزبېک تیلیده هم کتابلر نشر اېتیشگه اولگورگنینی ایتدی.

مراسمده محمدعالم کوهکن، داکتر حفیظ الله فیاض، دوکتور عزیزالله آرال‌لر هم سۉزگه چیقیب افغانستانده اۉزبېک تیلیده باله‌لر ادبیاتی اۉتمیشی و حاضرگی احوالی استیده تۉختلیب، جامعه‌نی رواجلنتیریش اوچون باله‌لر ادبیاتی مهم‌لیگینی تأکیدله‌دیلر. 

افغانستان نینگ معلومات مرکزی اۉزبېک تیلیده نشر اېتگن کتابلر محمد حسن تۉلقین تامانیدن ترجمه قیلینگن. کتابلر 500 تیراژده نشر اېتیلگن. حمیدی رسا اۉزبېکلر جماعه‌سیده اوشبو کتابلرنی ساتیب آلیشگه اشتیاق کۉپ بۉلگن تقدیرده کتابلرنی کوپ تیراژده قیته نشر اېتیلیشی ممکن دېیدی.

بوندن آلدین هم “گهواره” ناملی مرکز تامانیدن اۉزبېک تیلیده باله‌لر ادبیاتیگه عاید بیر قطار کتابلر نشر اېتیلگن اېدی.

مراسم سۉنگیده ACKU نشر اېتگن کتابلر کۉرگزمه‌سی آچیلدی. جوزجان ولایتی اهالیسی نینگ ولسی جرگه‌ده‌گی نماینده‌سی بکتاش ایشچی افغانستان نینگ معلومات مرکزی تامانیدن اۉزبېک تیلیده نشر اېتیلگن کتابلردن 300 جلدینی ساتیب آلیب مملکت اۉزبېک باله‌لریگه ساوغه قیلیشینی بیلدیردی.

 

نمایش بیشتر

نوشته های مشابه

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *