بیر گروه یاشلریمیز اۉزبېک تیلی و ادبیاتی بۉییچه اۉزبېکستانده تحصیلنی بیتیردیلر نتیجه ایستلگندېک بۉلدیمی؟

عالم کوهکن

اۉزبېکستانده تحصیلینی بیتیرگن بیر گروه افغانستانلیک اۉزبېک یاشلری او یېرده قالیب بلندراق سویه تحصیل آلیشنی ایسته‌یدیلر. بونگه افغانستان حکومتی شرایط یره‌تیشی کېره‌ک. تفصیلاتلر بیلن مېن عالم کوهکن کابلدن تنیشتیره من.

بوندن تقریباً ایکی ییل آلدین اۉزبېک تیلی و ادبیاتی بۉییچه تحصیل آلیش اوچون اۉزبېکستان نینگ سورخان دریا ولایتیگه بارگن 96 کیشیلیک بیر گروه افغانستانلیک اۉزبېک یاشلری (85 اېرکک و 11 قیز) یقینده اۉزبېکستان نینگ امیر علیشیر نوایی نامیده‌گی اۉزبېک تیلی و ادبیاتی بیلیم یورتی نینگ تیرمیزده‌گی بۉلیمیده تحصیلنی بیتیردیلر.

او‌‌لر اۉزبېکستانده تحصیل آلگن‌لیکلریدن راضی اېکنلیکلرینی ایته‌دیلر. اسدالله بارز، تیرمیزنینگ افغانستان وطنداشلری تعلیم مرکزیده تحصیل آلگن طلبه‌لرنی اۉزبېکستان عالی اۉقوو یورتلریدن بیریده بلندراق سویه‌ده تحصیل آلیشلیککه اشتیاقی بارلیگی ایته‌دی:

«مېن و مېن بیلن بیرگه بو یېرده تحصیل آلگن افغانستانلیک یاشلر قۉشنی اۉزبېکستان عالی اۉقوو یورتلریده ماسترلیک سویه‌سیده تحصیل آلیشنی ایسته‌یمیز. اۉزبېکستان تامانی افغانستانلیک اۉزبېک طلبه‌لرنی اۉزبېکستان عالی اۉقوو یورتلریده تحصیل آلیشلری اوچون شرایط یره‌تیشگه تیار» دېیدی بارز.

تیرمیزنینگ افغانستان وطنداشلری تعلیم مرکزیده تحصیل آلگنلردن باشقه بیری جمشید جسور نا معلوم سببلرگه کۉره افغانستان حکومتینی اولرگه اۉزبېکستانده قالیب بلندراق سویه‌ده تحصیل آلیشلری اوچون شرایط یره‌تیب بېریشدن باش تارته‌یاتگنیدن ناراضی. او افغانستان دولتینی تیرمیزده تحصیل آلگن افغانستانلیک اۉزبېک طلبه‌لرنینگ تحصیل پولیدن بیر قسمینی اۉزبېکستان تامانیگه تۉلمه‌گنی باره‌سیده اۉزبېکستانلیک اۉقیتووچیلریدن اېشیتگنینی ایتدی.

«بیز بېش آی کېچیکیب تیرمیز گه کېلدیک، افغانستانده اداره‌مه‌ـ اداره یوریب سندلریمیزنی تیارلشگه مجبور بۉلگن اېدیک. تیرمیزگه کېلیشیمیزدن آلدین جمهور رییسیمیز محمد اشرف غنی بیز بیلن اوچره‌شیب بیزگه یخشی یوتوقلر و آمدلر تیله‌دی، هر بیزینگیز نوایی بۉلینگلر دېگن اېدی. بیزنی کابلدن تیرمیزگچه طیاره بیلن جۉنتدی. تیرمیزده بیزنی یخشی کوتیب آلدیلر. حکومتیمیز اۉز وقتیده بیزگه معاشلریمیزنی تۉله‌‌مگنیدن قیینلدیک. اعتراضلر بیلدیریب، میدیاگه چیقیب معاشلریمیزنی قۉلگه کیریتدیک. بو یېرده بیز مسابقه‌لرده قتنشیب بیرینچی‎‌ـ ایکینچی اۉرینلرنی اېگلّه‌دیک.» دېدی، جمشید جسور.

افغانستانلیک اۉزبېک کوزه‌تووچیلری امو دریانینگ جنوبی تامانیده حیات کېچیره‌دیگن اۉزبېکلر فرزندلری اوچون اۉزبېکستان بیلیم درگاهلریده تحصیل آلیش قۉله‌یلیگینی ایته‌دیلر. جوزجان بیلیم یورتی استادی یازووچی نورالله آلتای مملکتده اۉزبېک فرزندلرینی ایریم ساحه‌لرده اینیقسه اۉزبېک تیلی و ادبیاتی بۉییچه قوشنی اۉزبېکستانده تحصیل آلیشلری اوچون کۉپ ییللیک شرطنامه‌لر امضالنیب عملده تطبیق اېتیلیشیگه ضرورت بارلیگینی معلوم قیلدی.

« افغانستانده اۉزبېک تیلینی قۉشنی اۉزبېکستان یاردمیسیز تصور قیلیش قیین البته. بوندن ایکی ییل آلدین تقریباً یوز کیشلیک بیر گروه یاشلریمیزنی اۉزبېک تیلی و ادبیاتی بۉییچه تحصیل آلیش اوچون اۉزبېکستانگه جونه‌تیلگنی بیزنی قوانتیرگن اېدی. افسوس که بو بیر مرتبه‌لی بۉلیب قاله‌دیگنگه اۉخشه‌یدی. افغانستانده اۉزبېک تیلی و ادبیاتی متخصصلرینی یېتیشتیریش اوچون بیزنینگ یاشلریمیزنی اۉزبېکستان بیلیم یورتلریده بیر وقتگه قدر دواملی روشده تحصیل آلیشلریگه کته احتیاج بار.» دېیدی استاد آلتای.  

افغانستان جمهور رییسی‌نینگ مرکزی آسیا دولتلری بۉییچه مصلحتچیسی متخصصی خانم فوزیه آرال ایریم عامللر جمله‌دن یېترلی بودجه یۉقلیگی باعث، اۉزبېک تیلی و ادبیاتی بۉییچه تحصیل آلیش اوچون قۉشنی اۉزبېکستانگه محصللرنی جونه‌تیش نا معلوم وقتگه قدر تۉختب قالگنینی ایته‌دی.

اونگه کۉره حاضرگی کونده کمیده 25 کیشی افغانستانلیک محصللر تخنیک و تېمیر یۉلی فنلری بۉییچه اۉزبېکستان نینگ سورخان دریا ولایتیده تعلیم آلماقده‌لر.

بوندن تقریباً ایکی ییل آلدین شاشمه شاشرلیک بیلن 96 کیشیلیک بیر گروه محصللرنی اۉزبېک تیلی و ادبیاتی بۉییچه تحصیل آلیش اوچون تیرمیزگه جۉنه‌تیلگن اېدیلر، اوشبو لایحه مسووللری اۉزبېکستانگه باره‌دیگن محصللرنی سیناودن اۉتکزیب استعدادلی یاشلرنی جۉنه‌تیشلری کېره‌ک اېیدی. افسوسکه تنیش‌ـ بیلیش، واسطه‌ـ وسیله اساسیده اۉقیشگه بارگن یاشلر او یېرده یخشی اۉقیش اۉرنیده کۉپراق سیاحت و معیشت بیلن مشغول بۉلگنلر، بیز مذکور لایحه‌دن کوتیلگن نتیجه‌لرنی قۉلگه کیریته آلمه‌دیک دیېدی، خانم فوزیه آرال.

او، یقین آره‌ده حکومتنی یېترلی بودجه یۉقلیگی باعث اۉزبېک تیلی و ادبیاتی بۉییچه لیسانس سویه‌سیده تحصیل آلیشلری اوچون قۉشنی اۉزبېکستانگه محصللر جۉنه‌تیش باره‌سیده برنامه‌سی یۉق. اما، سناقلی اۉزبېکلرنی اۉزبېک تیلی و ادبیاتی بۉییچه ماسترلیک درجه‌سیده تحصیل آلیشلری اوچون اۉزبېکستانگه جۉنه‌تیش ممکن دېدی.

نمایش بیشتر

نوشته های مشابه

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *