خورشید دوران 68 یاشیده

خورشید دوران 1952 ییل 20 جنوریده سمرقند ولایتیگه قره‌شلی چاردره قیشلاغیده توغیلگن. اۉزبېکستان خلق شاعری (1999). تاشکېنت دولت اۉنیورستیتی نینگ ژورنالیزم فاکولته‌سینی توگتگن (1975). دستلبکی شعرلر تۉپلمی — «قدردان قویاش» (1979). «شهرده‌گی آلمه‌ درختی» (1979)، «تونگی باغلر» (1981)، «اوچیب باره‌من قوشلر بیلن» (1983)، «توماریس نینگ کۉزلری» (1984)، «باله‌لیک نینگ آوازی» (1986)، «ققنوس» (1987) کبی شعری تۉپلملری نشر اېتیلگن.

«سمرقند خَیالی» (1991)، «صاحبقران نبیره‌سی» (1995)، «شهیدلر شاهی» (1998) کبی تاریخي-معرفی قصه‌لر مؤلفی. تاریخی سیمالر حیاتی حقیده هم صحنه‌ اثرلری یازگن («میرزا اولوغ‌بېک» — «الغول»، 1995؛ «بابرشاه»، 1996). شرق و غرب شاعرلری نینگ اثرلریدن عبارت «قیرق بیر عشق دفتری» (1989) و جاپانلیک شاعرلر شعرلریدن ترکیب تاپگن «دېنگیز یپراقلری» (1988) تۉپلملرینی اۉزبېک تیلیگه ترجمه‌ قیلگن. «دوستلیک» نشانی بیلن مکافاتلنگن (1997).

اۉغلیم تېمور گه

اۉغلیم، بو یېرـ

بیزنینگ یېریمیز.

اۉزیمیزنینگ یېریمیز. یېر جوده قتیق‌ـ

بابالرنینگ قانی قاتیرگن اونی،

مامالرنینگ کۉز یاشی قاتیرگن.

اۉغلیم، بو یېرـ

اۉزیمیزنیکی،

هَدیکسیره‌مه،

هه دېب قره‌وېرمه آرقنگگه.

ییقیلسنگ، کۉتَرر

سېنی بو توپراق.

ییقیلسنگ، تورماقنی اۉرگنه‌سن،

تورماقنی اۉرگن، اۉغلیم،

ییقیلسنگ، اېمه‌کله‌مه‌،

اېمه‌کله‌گنیم یېتر، اۉغلیم،

قد تیکلشنی اۉرگن،

شونینگ اوچون بیزگه بېریلگن

بو یېرـ بو وطن.

1981

ییگیرمنچی عصر آدمی

بیر اِییب کېتدی مهردن کۉکسیم،

هاولیقیب اۉتلاققه یۉل آلدیم شتاب.

گلده‌ی یشنه‌ی بېردی قوانچدن دلیم،

نورینی ایه‌مَی قویرکن آفتاب.

 

باره‌سالیب یېرگه چۉزیله توشب،

اۉتلرنی قوچاقلب بغیریمگه باسدیم.

یومشه‌گن کۉکسیم نینگ بیر چېتین تېشیب،

مرورید گللرنی شاده‌لب آسدیم.

 

مېن سېنینگ باله‌نگ من دېدیم شیویرلب،

یوزیمگه چومالی اۉرمه‌لب چیقدی.

و مېنگه ایشانیب سېکین غیمیرلب،

بورنیم نینگ اوچینی نا گهان چقدی.

 

شو زهات اېزغیلب تشله‌دیم اونی،

شو زهات غضبله باقدیم قویاشگه.

و اېرته بهارنینگ اېنگ گۉزه‌ل کونی،

غضبدن قیته‌دن ایلندیم تاشگه.

 

اوخله‌گنلر

اوخله‌گنلر اویغانینگ،

شیویرلر تون ارا شمع.

دست اویغانیب قره‌سم،

آقیب یاتیبتی قانیم.

 

اویغانیب قره‌سنگ چی،

اویغاتیب قره‌سنگ چی.

اچّیغ کۉز یاش، قاره قان،

قانگه بۉیه‌لگن قمچی.

 

بیتون زندان، کۉر قۉرقوو،

آق توس سېپیلگن کونده.

اویقودن اویغانینگ هو،

قالیب قېتمنگیز تونده.

 

قادری[1]‌نی اېسلب

ییللر اۉتیب بارسه‌ـ ده، همان،

قومسَب‌ـ قومسَب اۉقییمیز سیزنی.

سیز به مثلِ زنگاری آسمان،

بیز قومسه‌یمیز آسمانیمیزنی.

 

 

چغیر تاشلی آلیس یۉللردن،

آتده یېلیب اۉته‌میز بیرگه.

ایلنتیریب کوموش نینگ عادی،

سۉزلرینی باکره شعرگه.

 

ینه آرتگه قه‌یته‌میز کېیین،

کېله‌جککه باقه‌میز مفتون.

نیمه‌دن دیر ایچیکیب، قیین،

اۉیلر ایچره قاله‌میز بېین.

 

کېیین ینه اوی دېره‌زه‌سی

آچگن کبی صاف غوالرگه،

بۉغریققن، دیم اوی دېره‌زه‌سینُ

آچگن کبی شوخ نوالرگه-

 

توییب دلده معصوم اونلرنی،

تیتره‌ب‌ـ تیتره‌ب دل لرزه‌سیده‌ی،

بیز آچه‌میز “اۉتگن کونلرنی”

یوره‌گیمیز دېره‌زه‌سیده‌ی…

1983

 

اېرک گلی

—  اېرک گلی بار، دیېرلر، بووی‌جان،

شو گل حقده مېنگه سۉیلب بېر.

او گل قیده اۉسر شادمان،

ایتگیل گل نینگ مکانی قه‌یېر؟

 

—  آ، باله جان بو سرنی بیلسنگ

غم کېلرو دلینگ قیسه‌دی‌ـ

او گل اېرک دېب جان بېرگن اېرلر

مزارلری اوزره اۉسه‌دی.

1984

 

عثمان ناصر[2]خاکی اوستیده

سکوت قوچگن قبرستان اوزره،

تۉکیله‌دی برگلر بی صدا.

ایلک‌بار قبرینگ اوستیگه بۉزلب

کېلیب، منه توریب من تنها.

 

بونچه پنهان توتدین سرلرینگ،

بونچه سویدینگ ساووق اېللرنی.

اویغانمه‌دینگ، حتا شعرلرینگ

اویغاتگنده بیزنینگ دل لرنی.

 

سېنی ساتگن آدملر تیریک،

همان اولر ساتیب یوررلر.

بلکه اولر یشیرین، پنهان

مزارینگگه کېلیب توررلر.

 

مېن اولرنی تنییمن … گرچه

خایینلرنی قیلیشمس آشکار.

چونکه اولر اېندی بیزلرنی

اۉلدیرماققه، ساتماققه درکار.

 

یقینله‌شیب کېله‌یاتیر تون،

یادینگ کبی اضطرابلی دم،

یوره‌گیمنی اېریتماق اوچون

یاندیره من قبرینگ اوزره شمع.

1988

منبع: https://www.facebook.com/yozuvchilar.uyushmasi.
http://n.ziyouz.com

 

 

 

 

 

 

 

 

 

 

 

 

 

 

 

 

 

 

 

 

 

 

 

[1] . عبدالله قادری اۉزبېک یازووچی و شاعر. “اۉتگن کونلر” رومانی مؤلفی. اۉزبېک رومانچیلیگی اساسچیسی.  1938 ییلی 44 یاشیده کمونیستلر حاکمیتی تامانیدن قتل اېتیلگن.

[2] . تنیقلی وطنپرور اۉزبېک شاعری، ترجمان و درامه‌نویس. 1912 ییلی اۉزبېکستان نینگ نمنگان ولایتیده توغیلگن. شورالر تیزیمی نینگ قتغان دوری قربانلریدن حسابلنگن عثمان ناصر، 1944 ییلی وفات اېته‌دی.

نمایش بیشتر

هفته نامه اولوس

هفته نامه اولوس یکی از هفته نامه های فعال کشور در عرصه‌های سیاسی، فرهنگی، اجتماعی و اقتصادی است.

نوشته های مشابه

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *