اۉزبیکستان یازووچیلر اویوشمه‌سی اعضاسی، اۉزبېکستانده خذمت کۉرستگن مدنیت خادمی عظیم سویون 9- مارچ 72 یاشیده عالمدن اۉتدی.
عظیم سویون 1948- ییلی فبروری آیی نینگ 22- کونی سمرقند ولایتی نینگ نَوکورت قیشلاغیده محنتکش بیر عایله‌ده توغیلگن. 1977- ییلی تاشکېنت دولت یونیورستیتی نینگ ژورنالیزم فاکولته‌سینی بیتیرگن. تاشکېنت یونیورستیتی” گزیته‌سی، غفور غلام نامیده‌گی ادبیات و صنعت نشریاتیده محرر بۉلیب ایشله‌گن. شونینگدېک او، اۉزبېکستان دولت مطبوعات کمیته‌سیده ادبی مصلحتچی، اۉزبېکستان یازووچیلر اویوشمه‌سیده مسوول کاتب، “خلق سۉزی” گزیته‌سی باش محرری، “اۉزبېکستان آوازی” و “گلستان” ژورزناللریده فعالیت آلیب بارگن. 2002- 1993 ییللرده “اۉزبېکستان آوازی” باش محرری وظیفه‌لریده ایشله‌گن. عظیم سویون بوتون جهان شاعرلر کنگره‌سی اعضاسی هم بۉلگن.
عظیم سویون استعدادلی، حقیقتگوی و عصیانکار شاعر صفتیده تنیلگن. او، 60- ییللرنینگ آخری و 70- ییللر باشلریده اۉز ایجادی فعالیتینی باشله‌گن. “مېنینگ آسمانیم” آتلی بیرینچی شعری تۉپلمی 1978 ییلی نشر اېتیلگن. اوندن کېین شاعر نینگ اۉنگه یقین شعرلر تۉپلملری و داستانلری چاپ اېتیلیب، کتابخوانلر گه یېتکزیلگن. ضرب (1979)، زمین تقدیری (1981)، خیالات (1984)، ضیا کۉلی (1986)، جوزا (1987)، آلیس تانگلر (1989)، کویگنیم- سویگنیم (1992) کبی شعری تۉپلملری باسیلگن.
عظیم سویون نینگ “سربه دارلر”، “اۉزبېکستان”، “بیر تامچی سوو دېنگیزگه ایلنگن کېچه یا که عمارت” عنوانلی داستانلری بیلن اۉزبېک کتابخوانلری تنیشلر. ایجادکار داستانلریده اۉز زمانداشلری تقدیری، اچیق حیاتی، اینتیلیشلری و اولر آلیب بارگن کوره‌شلر اۉز افاده‌سینی تاپگن.
شاعر، اۉزبېکستانده ادبی فعالیتلری اوچون عبدالحمید چۉلپان نامیده‌گی خلق ارا مکافاتگه سزاوار بۉلگن. او، 1992 ییلی تورکیه‌ده اۉتکزیلگن “تورکی اولوسلر ادبیاتیده تورکی تیل” انجمنیده تورکیه یازووچیلر بیرلیگی نینگ مکافاتینی قۉلگه کیریتگن. اونینگ بیر قطار شعرلری و کتابلری انگلیس، روس، تورک، قزاق، تاجیک و تُووَه تیللریده ترجمه قیلینگن.
شاعر عظیم سویون اۉزبېکستان عالی مجلسی اعضاسی بۉلیب خذمت قیلگن.
شاعرنینگ اۉلیمی نه فقط اۉزبېکستان بلکه بوتون دنیا اۉزبېکلری و تورکی خلقلری اوچون آغیر جدالیک بۉلدی. “اولوس” هفته‌لیگی مسوول مدیری و ایشلاوچیلری عظیم سویون وفاتی یوزه‌سیدن قۉشنی اۉزبېکستان ایجاد اهلی، اهالیسی و بوتون دنیا اۉزبېکلری گه اۉز قیغوداشلیگینی اظهار اېته‌دی.
عظیم سویون نینگ آخرتی آباد بۉلسین، یادی و خاطره‌سی منگو قالسین!
عظیم سویون ایجادیدن نمونه‌لر:
وطن
وطن _ بو بویوک سۉز،
هر بیر حرفینی،
هجالب اۉقیسنگ، بۉلگَی سن آباد.
دست اول وفا قیل،
بۉلگین جان و کۉز،
تا که سېن تیریک سن،
تا که سېن حیات.
سۉنگره عدالت نینگ یلاوین[1] کۉتر،
هر ایشده او بیلن ایشله یانمه -یان،
تینچلیکنی اۉزینگده، بنیاد اېت- کۉتر.
یوره‌ک- له یان، البت،
ایشانچ ایله یان.
عزیزلیک رتبه‌سی اجدادلردن دیر،
نجات اسمی دایم وطن مغزیده…
دېمک، اهلِ وجدان بیلن بیرمه- بیر،
یورمک کېره‌ک دایم نور نینگ ایزیدن.
وطن- بو یوکسک سۉز،
اونینگ مهریدن
یوکسه‌لر وفا-یو همده عدالت.
تینچلیک نینگ گوهری
جِلا سِحریده.
عزیزلیک و نجات،
تا ابد حکمت…
سېن وطن سۉزینی هجالب اۉقی،
هر حرفی کۉکسینگده یانسین لاویلّب.
اونینگ تۉلقینیده قلب بیلن اۉقیب،
افقلرگه اینتیلگین
تاشیب، شاویلّب…
وطن- بویوک سۉز دیر…
بهار
لکلکلر- له اوینه‌دی بهار،
باغ- راغلرنی شه‌یله‌دی بهار.
غم غصه‌نی هه‌یده‌دی بهار،
کۉنگلیمه پاک حسلرنی ایلدیم،
آنه یورتگه سجده لر قیلدیم.
تاشکېنتیمده بلقییدی قویاش،
بخارادن چارله‌دی دلداش.
بهاوالدین نقشبند یۉلداش،
یۉل باشیده سعادت کۉردیم،
آنه یورتگه باش اېگیب توردیم.
چېگره بیلمس شعر
یره‌تگن اېگم نینگ یۉریغی- یارلیق:
آفتاب زمین اوزره گلخن یاقه‌دی.
دریاگه ایله‌نیب تاغده‌گی قارغلیق،
چېگره نې‌لیگین بیلمه‌ی آقه‌دی.
بلند نظر قوشلر، آ، آزاد قوشلر،
کۉردیم: حُر-حُر، اېرکین- اېرکین کۉچه‌دی،
بوگون غربده اېرتن مشرقده قیشلر-
چېگره نې‌لیگین بیلمه‌ی اوچه‌دی.
سرحد نې بیلمه‌یدی میتّی باللری،
بال ییغر دنیاده بار چېچکلردن،
… کۉکلرگه اۉرله‌یدی یوره‌گیم زاری-
آدمزاد یsره‌تگن چېگره‌لردن.
[1] یلاو: بیرق
