اۉزبیکستان خلق شاعری آخونجان حکیم اوف 86 یاشیده عالمدن اۉتدی

2020 ییل نینگ 26 مارچ کونی اۉزبېکستان خلق شاعری، اۉزبیکستان یازووچیلر اویوشمه‌سی اعضاسی آخونجان حکیم‌اوف 86 یاشیده عالمدن اۉتدی.

آخونجان حکیم‌اوف نینگ بیرینچی شعري کتابی «الهام واديسی» 1961 ییلده نشر اېتیلیب، کتابخوانلر و ادبي جماعتچیلیک اۉرته‌سیده شاو-شوولرگه سبب بۉلگن. مشهور ادبیاتشناس عالِم، اۉزبېکستان قهر‌مانی آزاد شرَف‌الدین اوف اۉشه ییلده‌یاق شاعر نینگ اوشبو کتابی حقیده فکر یوریتر اېکن – «اد‌بياتیمیزگه ینگی نفس بیلن ایستعدادلی شاعر کیریب کېلدی»، – دېب یازگن اېدی.

اونینگ «داستانلر» (1970)، «قۉللریم کۉکسیمده» (1976)، «تفکر باقي» (1982)، «وطن قصیده‌سی» (1984)، «اۉشل کون کېلور» (1990)، «کۉزلرینگنی اۉزی قرا» (1992)، «قیزلر خَیال سورسه‌لر» (1995)، «محبتنی کۉزلردن ایزلنگ» (1996)، «ملکلر صور‌تی» (2004)، «دنیا، دنیا…» (2005)، «عالم غلط، آدم غلط» (2009)، «کۉکسینگیزده یشه‌سم دېیمن» (2010)، «دردینگیزگه مرهم بار» (2010)، «اویینگیزگه ساوچی باره‌دی» (2013)، «بیر دیار بار» (2013) شعري تۉپله‌ملری نشر اېتیلگن.

آخونجان حکیم‌اوف قۉشیق نویس شاعر صفتیده هم حرمت احترامگه سزاوار بۉلدی. اونینگ یوزلب شعر و غزللری قۉشیقلرگه ایلندی. جمهوریت (اۉزبېکستان)‌ده‌گی اېنگ تنیقلی حافظ لر، یاش اجراچیلر اونینگ شعر و غزاللریگه بسته‌لنگن قۉشیقلرینی اجرا اېتیب شهرت تاپدیلر. اونینگ بیر تورکوم شعرلری انگلیس تیلیگه اۉگیریلیب مشهور خوانند‌ه‌لر اجراسیده دنیا نینگ کۉپ‌گینه مملکت خلقیگه تارتیق قیلیندی.

استقلال ییللریده اونینگ اۉندن زیاد شعري و نثري کتابلری نشر اېتیلدی. زمانوي موضوعلرده اۉنگه یقین پېسه (درامه اثری)‌لری دنیاگه کېلدی. «شرق» نشریاتیده ادیب نینگ بیر نېچه‌ سه‌یلنمه‌لر و اوچ تۉملیک تنلنگن اثرلری نشر اېتیلدی. بولر ادیب نینگ «کۉکسینگیزده یشه‌سم دېیمن»، «بیر دیار بار»، «غلطی دنیا» کتابلریدیر.

آخونجان حکیم‌اوف درام ژانریده هم تماشا‌بینلر اوچون منظور صحنه‌ اثرلری یره‌تدی. بو اثرلر آره‌سیده «بو چاللر یامان چاللر»، «تیکان سوپورگی»، «بقیراق تویه‌ نینگ توشلری» سینگری صحنه‌ اثرلری کۉپ سانلی تماشا‌بینلر اۉرته‌سیده کتّه‌ قیزیقیش اویغاتدی. اونینگ قلمیگه منسوب اَیریم کمیدی‌لر بعضی خارجي مملکتلر تیاترلری تامانیدن هم موفقيتلی صحنه‌لشتیریلدی.

آخونجان حکیم‌اوف اۉزبېکستان یازووچیلر اویوشمه‌سی فرغانه‌ ولایت بۉلیمی قاشیده‌گی «آلتین قلم» تۉگره‌گیده هم بیر نېچه‌ ییللر دوامیده‌ باشلاوچی شاعر و یازووچیلر بیلن ایزچیل مشغولاتلر اۉتکزیب، ینگی ایستعدادلرنی کشف اېتیشگه مناسب حصه‌ قۉشدی.

آخونجان حکیم‌اوف نینگ ادبیاتگه قۉشگن حصه‌سی مناسب قدرلنیب، 1998 ییلده «اېل-یورت حرمتی» نشانی و 2006 ییلده «اۉزبېکستان خلق شاعری» فخري عنوانلری بیلن مکافاتلنگن.

اولوس هفته لیگی رهبریتی شاعر آخونجان حکیم‌اوف وفاتی مناسبتی بیلن مرحوم عایله سی، یقینلری و اۉزبیکستان یازووچیلر اویوشمه سی رهبریتی و اعضالری گه اۉز قیغوداشلیگینی اظهار اېته دی. شاعر نینگ عالم دن اۉتیشی اۉزبیک ادبیاتی اوچون کته یوقاتیش بۉلدی. مرحوم نینگ جایی جنتده بۉلدسین، یادی و خاطره سی منگو قالسین!

منبع: اۉزبیکستان یازووچیلر اویوشمه‌سی فیسبوک صحیفه‌سی

نمایش بیشتر

هفته نامه اولوس

هفته نامه اولوس یکی از هفته نامه های فعال کشور در عرصه‌های سیاسی، فرهنگی، اجتماعی و اقتصادی است.

نوشته های مشابه

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *